05/04/2008   CALVO XIRIA 31 – BM OLEIROS 30

O Calvo Xiria gonseguiu a súa décimo primeira vitoria consecutiva en liga ao derrotar ao Balonmán Oleiros en Carballo, un trunfo que o deixa a un paso da promoción de ascenso a 1ª Estatal.

Volveu sufrir o Calvo Xiria -unha vez máis- para doblegar a un Oleiros que a piques estivo de dar a sorpresa en Carballo. O equipo de Marcos Rodríguez volveu amosar os defetos que xa puxera de manifesto no Rosal hai sete días e confirmou que a presión estalle a xogar unha mala pasada na fase decisiva do campionato. Pese a todo, os puntos quedaron na casa e só queda rematar a faena para poder xogar a fase de ascenso. O Bm Oleiros soubo impor o seu ritrmo pausado de xogo e nunca permitiu coller ao Calvo Xiria grandes diferenzas no marcador. De feito, os visitantes foron por diante durante moitos minutos do primeiro acto e, só ao final, puido o Calvo Xiria voltear o resultado para irse ao descanso con vantaxe dun gol (14-13). Os carballeses, moi brandos en defensa, sobrevivían en ataque grazas ao acerto e pundonor de Roberto, o xogador mais destacado dos carballeses. O equipo de Geno soubo parar o xogo, non deixar correr ao Calvo Xiria e, sen grandes alardes en ataque, conseguia meter o medo no corpo aos locais. 

A tónica do partido non cambio una reanudación, e o intercambio de golpes de un e outro aventuraba un novo final de infarto para o Calvo Xiria. Pese á pequena melloría experimentada en defensa, grazas á presenza de Álex, o Calvo Xiria seguía demasiado impreciso en ataque. O Oleiros seguía sen presa e sabía xogar cos nervios dos carballeses, sen atopar apenas problemas para manterse no partido. Pero mediada a reanudación, e grazas a unha dobre exclusión dos visitantes, o Calvo Xiria conseguía abrir unha pequena brecha de tres goles que lle daban un plus de tranquilidade á hora de afrontar os seus ataques. Bruno e Pablo tomaban o relevo de Roberto e conseguían facer goles con facilidade para desatascar a ofensiva local. Con rendas de dous e tres goles xogaba o Calvo Xiria ata os últimos cinco minutos de partido, onde unha reacción do Oleiros deixaba a resolución do partido para os últimos segundos. Roberto, que levaba todo o partido sem errar, dispuña dun penalti en inferioridade para que o Calvo Xiria se fora de dous goles a falta de dous minutos para o remate do choque. O estremo carballés estrelaba o balón na madeira e daba a opción ao empate do Oleiros. Os visitantes, tamén desde o punto de penalti, atopabanse con Quique pero, no rexeite, forzaban unha nova pena máxima que non desaproveitaría Miguel (30-30) Así se entraba no último minuto de partido. E aí apareceu Sebastián para, con aviso de pasivo, marcar um golazo desde dez metros que poñía ao Calvo Xiria por diante (31-30) Restaban poucos segundos e o Oleiros gozou dun último ataque para empatar o partido. Con dous xogadores mais sobre a pista, o conxunto de Geno non soubo xogar o último ataque e optou por um lanzamento lonxano de Merino que rexeitaba Iago sen problemas. Co lanzamento morria um partido moi tenso, onde hai que salientar o esforzo e xogo dun Oleiros que soubo como meterlle man ao Calvo Xiria.

04/04/2008

1ª AUTONÓMICA

O Calvo Xiria enfróntase este sábado, ás 17:00 h, no Pavillón Municipal da Zona Escolar, ao BM Oleiros, en encontro pertencente á vixésimo quinta xornada de liga en Primeira División Autonómica.

Penúltimo choque ligueiro para un Calvo Xiria que está obrigado a gañar para conservar a segunda praza da clasificación. O equipo de Marcos Rodríguez non debería ter problemas para doblegar a un Oleiros ao que xa foi quen de derrotar na primeira volta a domicilio. Non debería, eso si, fiarse o conxunto carballés. O Oleiros chega a Carballo co obxectivo da permanencia conseguido e completando unha gran temporada que o mantivo nos postos de honra no primeiro tramo de campionato. Aínda así, e polo que uns e outros se xogan, a vitoria debería quedar na casa. O factor cancha, como durante toda a temporada, ten que ser determinante para que o Calvo Xiria sume dous novos puntos que o deixen a un so paso da promoción de ascenso. Iso, contando coa vitoria do Seis do Nadal. Se o conxunto olívico non é quen de derrotar ao domicilio ao Lalín, e se o Xiria gaña ao Oleiros, o equipo de Marcos Rodríguez lograría a clasificación para a promoción de ascenso á falta da última xornada por xogar.

O adestrador carballés conta con toda a plantilla á súa disposición para afrontar esta nova final, incluído Dubra. O estremo comezou a adestrar esta semana, logo de superar a lesión nun xemelgo que o tivo afastado das pistas durante case catro meses. De todas formas, Marcos deixará a Dubra fóra da convocatoria e contará cos catorce xogadores que tan ben o están a facer durante a segunda volta do campionato. Ao carballés aínda lle faltan varias sesións para poñerse ao nivel físico dos seus compañeiros.

O xogo habitual de Calvo Xiria e Oleiros dista moito de parecerse. Os de Carballo optan pola rapidez nas súas accións, mentres que os coruñeses prefiren xogar máis pausados, controlando o tempo do partido. Na primeira volta, eso si, o Oleiros tentou sorprender ao Xiria cun xogo veloz e áxil, se ben os carballesessouberon reaccionar e acabaron remontando o partido. O Calvo Xiria deberá templar máis os nervios que como fixo en O Rosal, onde sentiu a presión de ter que gañar si ou si. A leción debe estar aprendida para un conxunto que, se funciona como o ben facendo na casa, non debería deixar escapar a oportunidade de sumar os dous puntos.

CONVOCATORIA: Quique, Iago, Cuco, Pablo, Sebastián, Roberto, Fernando Vázquez, Cristophe, Pombo, Manuel, Jesús, Chimpo, Alex e Bruno.

2ª AUTONÓMICA

O Ifecgás Pereira Xiria enfróntase este sábado, ás 19:00 h, no Pavillón Municipal da Zona Escolar, ao Caixanova OAR, en encontro pertencente á última xornada de liga en Segunda División Autonómica. Carballeses e coruñeses xóganse no último partido a terceira praza da clasificación, que dá dereito a xogar a fase de ascenso. O empate xa non lle vale aos carballeses tras a decisión do mércores do Comité de Competición de expulsar da competición ao Riveira e anular todos os resultados dos enfrontamentos contra o cadro do Barbanza. Con isto as cousas están co Ifecgás Pereira Xiria na terceira posición igualado a puntos co Viveiro e con un punto de vantaxe sobre o OAR. O partido promete fortes sensacións e servirá para calibrar o verdadeiro potencial dos carballeses. O equipo de Juan Manuel Rodríguez ten a oportunidade de poñer a guinda a unha boa temporada e, na súa estrea, xogar a fase de ascenso a Primeira. Non o terá doado o Ifecgás Pereira Xiria fronte a un equipo, o OAR, que xa foi quen de gañar na primeira volta por 38-36. Hai que destacar a presencia, nas filas coruñesas, do ex do Xiria, Mario, un deses xogadores que poden marcar as diferenzas nun encontro deste tipo.

CADETE FEMININO

O Punta del Este Xiria enfróntase este sábado, ás 12:15 h. no Pavillón da Gándara, ao Bm Narón, en partido correspondente á cuarta xornada do Trofeo Delegación Territorial. Debuta o conxunto carballés no torneo de Copa e faino coa disputa da cuarta xornada, logo de ter aprazados os dous partidos da primeira volta. O Punta del Este Xiria parte con poucas opcións de sorprender ao Narón, que se levou a liga gañando todos os partidos con moita comodidade. O obxectivo das carballesas será o de mellorar as súas prestacións e crecer pouco a pouco no seu xogo, ademais de tentar plantarlle cara ao máximo favorito da competición. No torneo de liga, o Narón dobregou ao Xiria nos seus dous enfrontamentos, cos claros marcadores de 9-29 e 34-10.

INFANTIL MASCULINO

O Procasa Xiria enfróntase este domingo, ás 12:00 h. no Pavillón Bergantiños, ao Tirso de Molina, en partido correspondente á décimo cuarta xornada de liga. Remata a súa participación na liga o Procasa Xiria, co obxectivo de auparse á terceira praza da clasificación, que ocupa na actualidade o seu rival. Ambos conxuntos están empatados a 15 puntos e os de Fernando Vázquez teñen unha boa ocasión para despedir o campionato con virtoria e encaramarse á terceira praza, por detrás do Ifecgás Pereira Xiria. Enfróntanse dous equipos moi igualados, como quedou de manifesto na primeira volta. Por aquel entón, Xiria e Tirso empataron a 29 goles no partido disputado en Ferrol.

INFANTIL FEMININO

O Asesoría Sueiro Xiria enfróntase este sábado, ás 10:30 h. no Pavillón da Gándara, ao Bm Narón, en partido correspondente á cuarta xornada do Trofeo Delegación Territorial. Ao igual que na categoría cadete, debuta o conxunto carballés no torneo de Copa coa disputa da cuarta xornada. Poucas opcións de vitoria tamén para o equipo infantil, que no campionato de liga tamén sucumbiu á superioridade do Narón con marcadores de 9-23 e 16-8. 

29/03/2008   MECALIA AT. NOVÁS 33 – CALVO XIRIA 34

O Calvo Xiria gonseguiu a súa décima vitoria consecutiva en liga ao derrotar ao At. Novás a domicilio nun choque no que os de Carballo pasaron máis apuros dos inicialmente previstos. Un gol de Roberto no último suspiro do partido permitiu aos verdibrancos sumar dous puntos que lles fan conservar a segunda praza á falta de tan só dúas xornadas para o remate da liga. O Calvo Xiria xogará a fase de promoción de ascenso se consegue sumar tres dos catro puntos en xogo, independientemente do que faga o Seis do Nadal.

Comezou ben o Calvo Xiria o partido, sobre todo en ataque. A rápida circulación de balón favorecía que tanto Bruno como Roberto finalizaran con éxito a meirande parte dos ataques dos carballeses. Só a pasividade defensiva dos verdibrancos permitía que o At. Novás non se fora do partido, pese a xogar sempre con desvantaxes de 3 e 4 goles. Co paso dos minutos, o Calvo Xiria foi quedando orfo de ideas en ataque e, curiosamente, o At. Novás conseguía poñerse a un gol do Xiria cun parcial de 3-0 cando xogaba en inferioridade numérica (15-16). O equipo de Marcos Rodríguez soubo endereitar a situación e, cun parcial de 1-4 nos últimos cinco minutos da primeira parte, conseguía chegar ao descanso cunha renda de catro goles (16-20). En nada se parecía o Calvo Xiria ao equipo que pasara por enriba do Seis do Nadal hai quince días e o xogo exhibido polos carballeses xeraba dúbedas cara á segunda metade. A indolencia defensiva, unida ao desacerto no ataque no último tramo do primeiro acto, non invitaban ao optimismo de cara á reanudación. O At. Novás, con só a aportación en ataque de Marcos e Pablo, bastábase para meterlle o medo no corpo ao Calvo Xiria. 

As sensacións que dera o Calvo Xiria na primeira metade confirmabanse na reanudación. O coxunto carballés non era quen de axustar a defensa e o At. Novás atopaba moitas facilidades para marcar. Só o acerto de Fernando Vázquez nos primeiros minutos da segunda metade permitía ao Xiria manter certa tranquilidade no marcador, con rendas de tres e catro goles. E así foi ata que, cun parcial de 4-0, o At. Novás conseguía poñerse por diante con dez minutos por xogar (30-29). A lesión de Sebastián (que con dous goles consecutivos parecía ser a solución no ataque do Xiria), o desacerto de Chimpo no lanzamento, o cansanzo de Pablo, a falta de balóns aos estremos e, sobre todo, a nula defensa, provocaron unha situación de nervios nas filas dos carballeses, que puideron tirar por terra todo o traballo realizado na segunda volta. Os dez últimos minutos foron de infarto. Se ao Calvo Xiria se lle notaba en exceso a presión de ter que gañar o partido, ao At. Novás tamén lle podía a presión de vencer nun partido importantísimo para salvar directamente a categoría.  O parcial de 3-4 nos últimos dez minutos fala ben ás claras do desacerto e nervios de ambos conxuntos nos minutos decisivos. Por fortuna para o Calvo Xiria, nesa fase do choque apareceu Iago quen, con varias paradas, abortaba as posibilidades de vitoria do At. Novás. Con once segundos por xogar, e co marcador empatado, o adestrador do Calvo Xiria pediu un tempo morto que deu como resultado o gol de Roberto a tres segundos do final. Un feliz desenlace de partido para un Calvo Xiria que sufriu máis do esperado na pista do antepenúltimo clasificado. Unha boa pedra de toque para afrontar os dous últimos partidos de liga ante Oleiros e Cangas. Só se os de Marcos Rodríguez están ao 100% poderán cantar a súa participación na fase de ascenso.