DIVISIÓN DE HONRA INFANTIL MASCULINA

LIGA

 

XORNADA 15

29/01/2012    GARAYSA XIRIA 32 – BALONMÁN MOAÑA 29

Garaysa Xiria: 32 (17+15): Arnejo (5), Diego, Gabriel (5), Borja F., Alex (1), Eiroa (3), Borja R. (5),  Juanca (10), Antón (1), Pablo (2) e Souto.

Bm. Moaña: 29 (16+13): Pérez (9), Barreiro (2), Piñeiro, Riobo (5), Barcia (5), Rodríguez (8) e Durán.

 

O Garaysa Xiria xogaba o primeiro encontro do ano como local, e chegaba con numerosas baixas, o que facía prever un encontro complicado contra un equipo como o Bm. Moaña sempre moi combativo e con xente moi forte fisicamente.  

O partido comezou moi igualado con alternancia de goles para ambos os dous equipos, aínda que o Garaysa tomou unha pequena vantaxe grazas a súa maior efectividade en ataque. Ao Xiria levoulle tempo tomarlle a medida ao ataque moañés que utilizaba moito os pases e ao seu pivote para superar aos defensores carballeses. Cunha marcaxe máis intensa sobre o pivote, o Garaysa conseguiu atascar o ataque do Moaña, o que o levou a tomar vantaxes de ata 4 goles ao longo da primeira metade, pero unha pequena racha de perdas de balón en ataque igualou o encontro co 17-16 do descanso. 

Tras a reanudación o Bm. Moaña amosábase moito máis canso, mentres que o Xiria non daba signos de cansanzo e non baixou a intensidade, nin en defensa nin nas transicións; pero tampouco era quen de tomar maior vantaxe ante un gran Moaña, que, fiel ao seu estilo, non deixou de pelexar pese a ir os 50 minutos perdendo. E tanto foi así que ata o último minuto os locais non puideron cantar vitoria. 

Ao remate vantaxe de 3 goles para un Garaysa Xiria crecido ante as importantes baixas e onde xente que habitualmente dispón de menos minutos soubo levar a responsabilidade con valentía e acerto. Nora boa e agardamos que a vindeira fin de semana, na visita ao Bm Cangas o equipo siga amosando esta mellora.

XORNADA 14

21/01/2012     ACADEMIA OCTAVIO 34 – GARAYSA XIRIA 39

 Academia Octavio: 34 (14+20): Iago (13), Javier, Carlos (2), David, Anxo, Aarón (1), Rodrigo (1), Diego (7), Miguel (6) e Fernán (4)

Garaysa Xiria: 39 (21+18): Manuel, Eiroa (4), Antón, Pablo, Souto, Carlos (4), Juanca (6), Arnejo (4), Gabriel (7), Alex, Borja, Pereira (6) e Iván (8)

 

Comezaba a segunda volta da competición na Liga de División de Honra Infantil e o Garaysa Xiria afrontaba un encontro complicado e importante no que se enfrontaba, como visitante, a un rival directo na táboa clasificatoria, o Academia Octavio, que chegaba cos mesmos 15 puntos que os de Carballo.  

O Xiria comezou o partido imprimindo moita tensión en tarefas defensivas o que provocou un comezo bastante atascado do Octavio que se viu obrigado a pedir un tempo morto moi cedo para  aclarar as ideas aos seus xogadores sobre como superar a profunda defensa carballesa. Corría o minuto 10 de partido e o Xiria xa mantiña diferenzas de 3 e 4 goles, que puideron ser máis de non ser polos erros de lanzamento en situacións claras de contraataque ou lanzamentos dende a zona do pivote.   

O Octavio mantíñase vivo grazas a capacidade goleadora do seu mellor xogador, que rematou sumando 13 dianas, pero non era suficiente para frear a avalancha do Xiria que deu un auténtico recital de contragolpes, rápidos e ben elaborados.  Con todo chegaba o remate da primeira metade cunha vantaxe de 7 goles para o Garaysa e con moi boas sensacións de xogo.  

Na segunda metade o Octavio saíu con moita forza e coas ideas máis claras no ataque posicional que tantos problemas lles dera no primeiro tempo; o que, unido á relaxación dos carballeses pola vantaxe acadada, deu moitos folgos aos vigueses que viron como volvían a ter opcións de entrar no partido. Pero non resultou máis que un aviso, xa que o Garaysa reaccionou moi ben e soubo retomar a intensidade defensiva, os apoios foron máis contundentes e o Octavio suaba de novo para perforar a porta dos de Carballo.  

O encontro encaraba a recta final co resultado xa decidido a prol do Garaysa, que foi o xusto vencedor deste bonito duelo.  

A vindeira semana o equipo carballés xogará como local logo de máis dun mes sen facelo. Nesta ocasión, o partido disputarase o domingo ás 12:00 h no Pavillón Municipal Carballo Calero contra o sempre correoso Bm Moaña.

XORNADA 13

14/01/2012    LAS 5 JOTAS LAVADORES 36 - GARAYSA XIRIA 31

Las 5 Jotas Lavadores: 36 (17+19): Agustín, Rincón, Seara (3), González (6), Lorenzo (7), Diéguez (3), Rodríguez (7), Barreiro (5), Lloira (2), Martínez (3), Pozueco, López.(

Garaysa Xiria: 31 (19+12): Manuel, Pablo (3), Arnejo, Carlos (4), Gabriel (4), Xurxo (2), Iván (6), Álex, Eiroa (1), Borja R., Pereira (4), Juanca (7), Souto.

 

O Garaysa Xiria retornaba á competición logo do parón de Nadal. Nesta ocasión visitaba a cancha do U.B. Lavadores, en Vigo, encontro que pechaba a primeira volta. Pero parece que non lle sentaron de todo ben as tres semanas sen competición aos rapaces do Garaysa, xa que o equipo non amosou a súa mellor cara, máis ben todo o contrario.

O partido comezou cun Lavadores moi motivado e xogando cunha intensidade moi alta, o que lles deu xa de inicio,  vantaxes de 3 e 4 goles. Pero isto non facía máis que empezar, xa que o Xiria non tardou en darlle a volta ao marcador tras varias boas defensas consecutivas rematadas en rápidos contragolpes. Pero os locais, lonxe de afrouxar a intensidade, seguiron defendendo forte, cun bloque moi compacto en zona de balón o que provocaba falta de ideas no atascado e pouco fluído ataque carballés.

Sen facer un gran xogo o Garaysa chegou ao remate da primeira metade cunha lixeira vantaxe de dous goles no marcador. Pero todo facía presaxiar unha segunda metade apretada no tanteo e dura na pista. E así foi. O Lavadores non tardou en empatar o encontro, e o Xiria, quen non chegaba a coller boas sensacións, vía como se lles poñían as cousas costa arriba. En tarefas defensivas os apoios non chegaban no intre axeitado e en ataque soamente as accións individuais mantiñan ao equipo no partido. Pese ás malas sensacións o Xiria chegou ao minuto 18 da segunda metade con vantaxes de 2-3 goles no marcador, cando comezou o desastre, pases ás mans dos defensas, lanzamentos precipitados directamente fora, erros nas recepcións sen defensores cerca, e unha serie de perdas de balón non forzadas que no último tramo do encontro deron vantaxe aos locais. O Xiria quixo arranxalo mediante accións individuais e caeu en máis precipitacións, o que rematou por colocar a diferenza en 5 goles, tras un parcial de 9-2 en los últimos 7 minutos.

Encontro para esquecer e pasar páxina. Agardamos que sirva para aprender que hai que xogar con intensidade de competición cada partido, sexa cal sexa o rival ao que nos enfrontemos. Xa pasara na visita a Ourense e en Pontevedra contra o Cisne, por exemplo, pero nesas ocasións o Garaysa acabou levando os dous puntos, pero esta vez non correu a mesma sorte e levou os puntos o equipo que máis o mereceu.

Na vindeira xornada o Garaysa Xiria volve a Vigo a xogar, nesta ocasión, contra o Octavio, que ten os mesmos 15 puntos que o Xiria. O encontro dispútase o sábado, ás 11.15 h na pista do Frontón.

XORNADA 12

18/12/2011     GARAYSA XIRIA 34 – NOVACAIXAGALICIA O.A.R. CORUÑA 25

Garaysa Xiria: 34 (19+15): Eiroa (2), Arnejo (2), Souto, Carlos (3), Juanca (7), Gabriel (7), Xurxo, Antón (3), Borja, Pereira (5), Pablo (2), Manuel, Iván (3).

OAR Coruña: 25 (12+13): Stern (5), García, Santiago (1), Amado (4), Rosende (4), Rey (2), Crecente (2), Sarasola (7), Lizaur, Rodríguez, Capelán.

 

Nova vitoria do Garaysa Xiria que continúa a súa progresión. Xa van 4 encontros seguidos sen deixar ningún punto atrás e o que é aínda máis importante, amosando un mellor xogo con cada partido que pasa.  

Nesta ocasión, pese a diferenza na clasificación entre os dous rivais, non se trataba dun partido calquera, xa que un derbi sempre é un partido complicado e duro, pero os do Xiria non deixaron lugar as sorpresas e xogaron un partido moi serio de inicio a fin, no que o Oar non tivo a penas opcións de poñerse por riba.  A defensa moi aberta e profunda sorprendeu aos visitantes, que encadearon varias perdas de balón xa ao inicio, o que lle deu a primeira vantaxe ao Garaysa, e obrigou ao seu técnico a solicitar un tempo morto para aclarar as cousas. Pero a defensa non baixou a intensidade e pese aos intentos do Oar a diferenza era cada vez maior para os locais. 

Quizais esa comodidade de ires por diante no marcador durante todo o encontro provocou que o Xiria non aproveitase os momentos de maior ofuscación do ataque oarista para sentenciar o partido.  

Polo demais gran partido do Garaysa Xiria, pode que un dos máis completos desta tempada, que álzase ata a 5ª posición con dous puntos máis que o Octavio, 6º clasificado.  

Agardamos que esta boa racha que tomaron os infantís do Xiria non fixera máis que comezar e que nesta segunda volta que está por vir amosen maior madurez e melloren os resultados da primeira. 

Agora toca descansar, xa que non será ata a volta do Nadal cando o equipo retome a competición, farano contra o U. B. Lavadores, no que suporá o remate da primeira volta.

XORNADA 11

03/12/2011    BM. PABELLÓN OURENSE 34 - GARAYSA XIRIA 37

Bm. Pabellón Ourense: 34 (18+16): Correa, Víctor, Pablo (3), Adrián, Javier (2), Raúl (7), Daniel (3), Diego (1), Anxo (2), Alejandro (3), Juan (1), Gabriel (12).

Garaysa Xiria: 37 (17+20):  Manuel, Arnejo (2), Carlos, Gabriel (8), Iván (12), Borja F., Alex (2), Eiroa (1), Borja R. (2), Pereira (3), Xurxo (2), Juanca (5), Souto.

 

Segunda saída consecutiva do Garaysa Xiria que nesta ocasión viaxaba ata Ourense, na viaxe máis longa da tempada, para enfrontarse ao Bm. Pabellón, pechacancelas da táboa e que, ata o de agora, non sumaba ningún punto.

Os de Carballo volveron a saír demasiado confiados da súa superioridade, como xa ocorrera na xornada pasada no encontro contra o Cisne, e froito desa relaxación inicial os do Xiria foron a remolque dos locais durante gran parte do encontro, sen grandes diferenzas no marcador, sempre a un ou dous goles, pero non foron quen en toda a primeira metade de colocarse por diante.

A parte da pouca intensidade coa que se comezou o encontro, o Garaysa tampouco soubo recompoñerse rapidamente e non foi quen de despregar o seu xogo, sobre todo en defensa, onde máis apuros estaba a pasar contra o ataque ourensán. Os dous laterais do equipo local volvían tolos aos defensas do Xiria aos que superaban con relativa facilidade. No aspecto ofensivo os de Carballo amosaron a súa mellor cara, pero a defensa foi demasiado anárquica, cada un preocupábase do seu e os apoios non chegaban ou facíano tarde e con pouca intensidade. Boa mostra son os 18 goles encaixados nos primeiros 25 minutos.

Tras a reanudación, máis do mesmo, o partido era un auténtico festival de goles, un vaivén de ataques rápidos nos que as defensas semellaban non estar presentes. Vendo o visto estaba claro que o encontro íao levar o equipo que mellor manexase os nervios de final de partido, e foi aí cando o Xiria tirou de galóns, apertou en defensa e en ataque xogou coa calma necesaria e non faiou. Nos últimos 4 minutos os locais non viron porta grazas a intensidade da defensa do Garaysa, o que se traduciu na vantaxe de 3 goles para o Xiria coa que remataba o encontro. Dous puntos máis que o alzan ao 6 posto por debaixo do Octavio, pero empatados a puntos. 

Esta fin de semana a liga interrómpese por mor dunha saída das seleccións galegas, infantil, cadete e xuvenil, que disputan en Madrid un torneo preparatorio para o Campionato de España de seleccións autonómicas. O Garaysa Xiria ten a un xogador nas filas da selección Galega, Juanca, xogador de primeiro ano e unha das grandes promesas deste grupo.

XORNADA 10

26/11/2011    CLUB CISNE DE BALONMÁN 28 - GARAYSA XIRIA 34

Club Cisne Bm.: 28 (10+18): Juan, Gonzalo (1), Conde (10), Torres (3), David (2), Javier (6), Mario, Miguel, Álvaro (2), Héctor (2), Alex, Alberto (1), Roque (1).(

Garaysa Xiria: 34 (16+18): Manuel, Pablo (1), Andrés (1), Arnejo (1), Carlos (4), Gabriel (7), Diego (2), Iván (4), Alex (2), Eiroa (3), Borja R. (2), Pereira (3), Juanca (4), Souto.

 

O Garaysa Xiria viaxaba ata Pontevedra para enfrontarse ao Bm. Cisne, 10º clasificado, por debaixo do Garaysa que marcha 7º na táboa. Esta pequena diferenza levou aos do Xiria a pensar que ía ser un partido máis doado do que rematou sendo. Os de Carballo saíron ao campo demasiado relaxados e as sensacións que se transmitían dende a pista non eran boas nos primeiros compases do partido. Non había concentración en tarefas defensivas e ao equipo custoulle despregar o xogo rápido de contragolpes ao que nos ten afeitos. O Cisne, con moito criterio e paciencia en ataque, non deixaba que o Garaysa se despegara no marcador e, aínda que en tarefas defensivas pasaba moitos apuros debido a superioridade física dos nosos, o acerto en ataque, ou máis ben a pouca intensidade da defensa do Xiria, mantíñaos no partido.

Os xogadores carballeses non tardaron en reaccionar e en canto a defensa se activou o equipo correu e as pequenas vantaxes trocaron en 6 goles de diferenza, cos que se chegou ao descanso.

TraS o inicio da segunda metade o Cisne recortou diferenzas tras varios erros en ataque do Xiria, que caía en precipitacións querendo finalizar as accións ofensivas de xeito individualista, abusando da súa superioridade física, o que se traducía en malas situacións de lanzamento. Durante toda a segunda metade houbo rachas moi boas onde o Garaysa atacou con bo criterio, encadeando varias fixacións consecutivas e rematando con lanzamentos claros ante o porteiro local, pero o equipo non acadou a regularidade necesaria para matar o encontro, e o Cisne estivo apertando ata os últimos minutos, onde chegou a meter o medo no corpo aos visitantes, pero varias paradas de Souto na recta final remataron co soño dos do Lérez.

Partido bastante irregular do Xiria que, pese a levarse a vitoria, pasou máis apuros dos previstos, vítima da relaxación ao subestimar ao rival. De seguro que os xogadores do Garaysa aprenderon a lección de que non hai rival que non poida darlles un susto se non andan finos e que sen esforzarse ao 100% calquera partido pode poñerse costa arriba. Na seguinte xornada o equipo carballés volve a xogar como visitante, esta vez viaxando ata a pista do Balonmán Pabellón de Ourense.

XORNADA 9

19/11/2011       GARAYSA XIRIA 34 – BM. ÁRTABRO OLEIROS JCA 29

Garaysa Xiria 34 (19+15): Manuel, Carlos (3), Gabriel (4), Diego, Antón (1), Iván (6), Alex (2), Borja F. (1), Andrés (1), Arnejo (2), Xurxo (1), Pablo (2), Eiroa (2), Borja (2), Juanca (3), Pereira (4), Souto.

B.M. Ártabro 29 (15+14): Rodríguez (12), Lago (3), Blasco, Giráldez (2), Graña, Fernández (3), Braña (1), Armesto (2), Río (1), Jimeno (2), Zas (3), Marqués.

 

O Garaysa Xiria retornou á senda da vitoria. Recibía, nesta ocasión, ao Balonmán Ártabro, equipo co que xa se enfrontara en pretempada, no que fora o primeiro partido deste ano para os infantís do Xiria e no que acabou perdendo de forma clara. Pero, dende aquela, o equipo mellorou notablemente e proba disto foi que, nesta ocasión, o Garaysa foi o que acadou a vitoria, amosando a súa superioridade durante todo o encontro contra un Bm. Ártabro con varios xogadores de gran talla e habituais na selección galega. 

O Xiria foi capaz de amosar o seu potencial no xogo en transición, cunha defensa moi intensa e activa propiciaba os roubos de balón que se convertían rapidamente en goles para os carballeses. O acerto das individualidades do Ártabro mantiña ao seu equipo á zaga pero sempre por detrás do Xiria.  

O encontro transcorreu do mesmo xeito ata a recta final, onde varios erros do Xiria poñían ao Ártabro a só dous goles e con posesión de balón. Unha boa reacción do Garaysa poñía de novo os cinco goles de diferenza cos que remataba o encontro.  

Na próxima xornada o Garaysa Xiria visita a pista do Cisne en Pontevedra, de onde agardamos poder traer outros dous puntos que irían colocando aos de Carballo onde realmente lles corresponde. O encontro disputarase o sábado 26, ás 12.30 h no Pavillón do Centro Galego de Tecnificación Deportiva da Xunta de Galicia.

XORNADA 8

12/11/2011     LA ROSALEDA 1997 BM. LALÍN 31 - GARAYSA XIRIA 25

La Rosaleda 1997 Bm Lalín: Óscar (4), Antonio (6), Uxío (3), Xabier (7), Jonathan (2), Alejandro (4), Fernando, Diego, Eduardo (4), Iván, Javier, Alejandro, Pedro (1), Lucas

Garaysa Xiria 25: Manuel, Carlos (2), Gabriel (5), Iván (4), Álex (1), Arnejo (1), Eiroa (1), Borja (1), Juanca (5), Xurxo (1), Pereira (4), Souto

 

Os infantís do Xiria viaxaban, nesta ocasión, ata terras do Deza para enfrontarse ao Bm Lalín, nun partido que, tal e como se presumía, foi igualado en canto ao nivel de xogo amosado por ambos equipos. Sen embargo non estiveron acertados cara ao gol os xogadores carballeses, ata 12 erros en situacións claras de lanzamento só na segunda metade. Con ese balance non se pode plantar cara a un rival do teu nivel. 

Malia á mágoa do resultado o Garaysa amosou no campo do que é capaz. Xogou toda a primeira metade de ti a ti con momentos nos que superaba con claridade o xogo do Lalín, encadeando boas defensas que se traducían en claros contragolpes, pero logo de facer ben o máis difícil cometíanse erros no máis doado, como en pases sen opoñentes, lanzamentos claros contra o porteiro. E iso era o que lle daba a vantaxe ao Bm Lalín.  

Tras o descanso os xogadores saíron coa fe posta en que ía rematar a mala sorte cara a portería, pero nada máis lonxe, xa no comezo da segunda metade o Xiria erraba 5 lanzamentos consecutivos dos seus exteriores case dende a zona lateral. O Lalín aproveitou a situación para coller varios goles de vantaxe que ían crecendo co paso dos minutos, xunto coa negatividade dos xogadores do Garaysa que cada vez vían a m do Lalín máis pequena e ao seu porteiro máis grande. 

Na recta final do encontro, e co resultado máis que sentenciado, cunha diferenza de 11 goles a prol dos locais, o Garaysa tirou de orgullo e volveu a ruxir para meterlle o medo aos locais que viron como o Xiria recortaba diferenzas de forma rápida. Pero xa era demasiado tarde e o Xiria caía vítima dos seus propios erros.

A vindeira fin de semana o Garaysa Xiria recibe a visita, sábado ás 10.30 h no Vila de Noia, do Balonmán Ártabro.

XORNADA 7

05/11/2011    GARAYSA XIRIA 25 – S.D. TEUCRO COVER 26

Garaysa Xiria: 25 (14+11):  Manuel, Arnejo, Carlos (5), Gabriel (3), Antón, Iván (2), Alex, Eiroa, Borja R. (2), Pereira (6), Juanca (7), Xurxo, Souto.

S.D. Teucro Cover: 26 (16+10): Rey, Schipper, Pérez (8), Ardao, Sánchez (1), Rivas (1), Piñeiro (3), Gómez, Altiriba (11), Fernández, López (1), Lorenzo(1).

 

O Garaysa Xiria recibía a visita da S.D. Teucro, un dos rivais directos polos postos altos da táboa. O encontro comezou bastante igualado, con dous equipos moi diferentes que xogaban a un balonmán moi diferente tamén. O Garaysa, cunha defensa moi aberta, tentaba facer do contraataque a súa maior arma, mentres que o Teucro, con xente moito máis corpulenta e forte, defendía cunha 5-1 moi pechada e a súa capacidade goleadora dependía dos seus dous mellores xogadores que remataron o encontro con 19 tantos entre os dous.

O Xiria xogou un partido con moitos altibaixos, con rachas de moi bo xogo seguidas de outras onde o equipo amosábase falto de ideas tanto en ataque como en defensa. Non foi ata a segunda metade cando o Garaysa conseguiu manter un bo xogo durante case todo o período, ata os últimos 5 minutos que, descentrados por varias decisións arbitrais clamorosas, volveron a perder o norte no xogo ofensivo e a intensidade na defensa, foi aí cando o Teucro aproveitou para darlle a volta ao marcador, e pasar así do 24-21 do minuto 21 ao definitivo 25-26.

Dolorosa derrota no último minuto que deixa moi mal sabor de boca entre os xogadores e afeccionados. Agardamos que no próximo encontro en Lalín a sorte se volva de cara aos nosos e poidan recoller algún froito de tanto traballo que tanto se lles está a negar nos últimos encontros. Moita sorte rapaces.

XORNADA 6

30/10/2011     BUEU ATL. BM. 31 - GARAYSA XIRIA 26

Bueu Atl. Bm.: 31 (17+14): Manuel, Rodrigo (4), Jose M. (2), Jose, Brais (3), Manuel (2), Juan L. (1), Juan D., Pedro (2), Abel, David (13), Raúl, Andrés (2), Carlos (1). (

Garaysa Xiria: 26 (14+12):  Manuel, Pablo, Arnejo, Carlos (2), Gabriel (5), Borja F., Iván (8), Alex, Eiroa, Borja R. (1), Pereira (1), Juanca (9), Souto.

 

O Garaysa Xiria visitaba esta semana a sempre complicada cancha do Bueu, logo de acadar un empate no seu ultimo partido como local contra a SAR, e tras amosar unha importante mellora no seu xogo os de Carballo chegaban ata terras do Morrazo con ganas de sumar unha nova victoria.

Dende o comezo puidemos ver a dous equipos entregados ao máximo, con defensas moi profundas que xa adiantaban o que ía a ser a tónica do encontro, ataques rápidos e moita velocidade nas transicións ataque defensa. O Xiria despregaba un bo xogo pero varios erros en lanzamentos claros e varias perdas de balón nas transicións colocaban por diante aos locais. Pese a que as diferencias nunca foron altas o Xiria merecía máis premio a todo o esforzo que estaba a realizar. O Garaysa chegaba 17-14 ao descanso e con moitas ganas de cambiar o sino do partido.

Tras o descanso máis do mesmo, o Xiria esforzábase en defender e en ataque sabía como superar a defensa do Bueu pero erraba demasiados lanzamentos, erros que seguían dándolle a vantaxe aos locais.  Os minutos corrían e o Xiria seguía cometendo demasiados erros que nun partido tan igualado coma este deciden o resultado, e así foi, os de Carballo non afinaron a puntería nos lanzamentos e canto menos tempo quedaba para revocar a situación máis afloraban os nervios entre os xogadores do Garaysa que terminaron perdendo por 5 goles nun encontro no que mereceron algo máis.  Agardamos que serva coma lección de que contra rivais de nome coma este os erros non forzados son un lastre que fan máis que complicado facerse coa victoria.  Moita sorte no vindeiro encontro no que os do Xiria reciben ao Teucro nun partido que se antolla igualado e no que de seguro veremos a un Garaysa mellorado e con ganas de retornar á senda da victoria.

XORNADA 5

22/10/2011     GARAYSA XIRIA 30 – S.A.R. “A” 30

Garaysa Xiria 30: Manuel, Carlos (3), Borja F., Gabriel (3), Iván (4), Álex, Arnejo, Antón, Pablo (1), Eiroa (3), Borja R. (1), Juanca (6), Pereira (9), Souto.

S.A.R. “A” 30: Amoedo (2), Táboas, Nantes (10), Soutullo (1), Bouzón (1), Lores (1), García (8), Alfaya (2), Docampo (5), Santamarta y San Román.

 

O Garaysa Xiria recibía no Pavillón Municipal Vila de Noia ao recién ascendido SAR de Redondela, nun duelo que xa se presentaba igualado ante os resultados colleitados por ambos conxuntos no que vai de competición. 

Dende o inicio do encontro os dous equipos saíron con defensas moi abertas, quizais o Xiria levaba un pouco máis alá a presión que os de Redondela, o que causou aos visitantes auténticos problemas para perforar a porta do Garaysa o que levou aos carballeses a tomar vantaxe no marcador xa na primeira metade. Pero nunca deixou a SAR que os de Carballo se distanciaran demasiado no marcador. En tarefas ofensivas puidemos ver a un Garaysa moi mellorado, cunha boa velocidade de balón e coas ideas máis claras que nunca para superar a defensa rival. Xa case no remate da primeira metade o Xiria encadeou varias defensas moi boas que colocaron no marcador o 17-14 do descanso, pero a SAR non ía deixar ir os dous puntos dun xeito tan doado. 

Tras a reanudación os de Redondela saíron coas ideas claras e, baseando o seu ataque nos seus máximos goleadores, Nantes e García con 18 goles entre os dous, conseguiron igualar de novo o partido e ata chegaron a tomar unha vantaxe de varios goles. Pero os locais amosaron madurez neses intres finais e conseguiron empatar o encontro no último minuto, co que suma un punto máis na táboa clasificatoria nun encontro que deixou un sabor agridoce entre os xogadores e seareiros que viron como o equipo lograba empatar un encontro que se lle puxera en contra na recta final pero que tras o visto nos 50 minutos os do Garaysa puideron facerse cos dous puntos. 

Nesta próxima semana o Garaysa viaxa a Bueu para enfrontarse a un dos pesos pesados da liga, partido que haberá que pelexar duro para poder traer os puntos dende O Morrazo, no que esperamos seguir vendo a progresión que amosa o equipo en cada encontro. Moita sorte.

XORNADA 4

15/10/2011     BM. PORRIÑO 29 - GARAYSA XIRIA 38

Bm. Porriño 29:  Alejandro, Juan (5), Miguel, Sergio (5), Borja (2), Gabriel (8), David, Lorenzo (2), Íñigo, Martín (3), Sergo, Fermín (4), Alex  y Óscar.

Garaysa Xiria 38: Manuel, Carlos, Gabriel (8), Iván (6), Alex (3), Arnejo, Eiroa (3), Borja (1), Juanca (10), Pereira (7), Souto.

 

 O Garaysa Xiria afrontaba esta pasada fin de semana a súa 4ª xornada de Liga, nesta ocasión volvía  a viaxar á Provincia de Pontevedra onde ía a enfrontarse ao Bm Porriño. 

O encontro comezou con máis de media hora de retraso, ás 13:20 do mediodía, e tras un quecemento demasiado longo e con paradas, o Xiria saíu ao campo coas ideas moi claras, con ganas de correr dende o inicio e cunha boa intensidade en defensa que pronto lle deu a primeira vantaxe do partido.

Pero non ía ser tan doado. Os locais seguiron presionando e non permitiron que o Xiria baixase a garda en ningún momento do encontro. A concentración defensiva tiña que ser  máxima para frear os ataques do Porriño e igualmente en tarefas ofensivas, o Garaysa estaba obrigado a facer ataques ben elaborados para ser quen se superar a defensa local. 

Con moito esforzo, e xogando a un bo nivel, o Xiria chegouse ao descanso cunha vantaxe de 5 goles, 15-20, ante un Porriño que lles esixía amosar a súa mellor cara. 

A segunda metade comezaba cunha forte intensidade por parte dos locais, que recurtaron ata colocarse a tan só a 3 goles de diferenza, pero a reacción do Xiria non se fixo agardar e tras varios balóns roubados en defensa, culminados con rápidos contragolpes, colleu de novo vantaxe no marcador, que non fixo se non aumentar ata os minutos finais, onde o Garaysa chegou a poñerse con máis de 10 goles ao seu prol. Co partido xa decidido o Porriño recurtou distancias para colocar o derradeiro 29-38 no marcador, resultado xusto tras o visto no terreo de xogo. 

O mellor partido do Garaysa Xiria no que va de tempada, cunha intensidade e concentración moi altas e mantidas durante a meirande parte do encontro, onde puidemos ver a un equipo moi mellorado logo da última derrota na casa contra o Cangas. A mellora é evidente e agardamos que non sexa más que un despegue cara o teito destes xogadores que aínda está moito máis alto. 

A vindeira xornada o equipo recibe ao S.A.R. de Redondela, equipo recén ascendido a División de Honra pero que polos resultados que acadou ata agora está amosando ter un bo nivel. Agardamos que os nosos continúen a progresión e poidamos ver un bo balonmán esta fin de semana no Vila de Noia.

XORNADA 3

15/10/2011     GARAYSA XIRIA 21 – B.M. CANGAS A 32

Garaysa Xiria 21: Manuel, Carlos (3), Gabriel (4), Iván (4), Alex, Arnejo, Eiroa, Borja (2), Juanca (3), Pereira (5), Souto.

B.M. Cangas A 32: David, Miguel (3), Fran (1), Adrián (4), Daniel (1), Ángel (2), Erik (5), Óscar (2), Cristian (1), Eloy (4), Javier (7) y Marcos (2).

 

O equipo infantil de división de honra, Garaysa Xiria, xogaba o mércores o seu terceiro encontro oficial. Nesta ocasión os carballeses recibían ao Bm Cangas, e facíano nun escenario atípico, pero tamén ben coñecido polos do Xiria, o C.E.I.P. Fogar. Sen embargo, este factor cancha non foi suficiente, xa que remataron perdendo o seus primeiros puntos na liga, fronte a un gran rival como o Bm. Cangas, con xente grande e moi forte nas súas filas. Quizais o Xiria acusou en exceso esa inferioridade física e non puido resistir os continuos envites dos do Morrazo, malia que se viron moitos momentos bos, nos que o Garaysa soubo plantarlle cara ao líder da táboa, a vitoria foi, nesta ocasión, para os de azul. 

O encontro dominouno o Cangas, que tomou vantaxe dende o comezo, o Xiria achegábase por momentos con boas rachas de xogo, xeralmente grazas a unha maior intensidade defensiva que propiciaba roubos de balón e contraataques, pero superar a defensa do Cangas xa formada resultaba complicado. 

Co tempo xa esgotado o marcador arroxaba un resultado de 21-32, nun encontro no que o Xiria non deixou de pelexar ata o final e no que, ademais, amosou unha boa mellora fronte a un gran rival que de seguro estará nos postos altos da táboa clasificatoria, xunto ao Bm Lalín, por suposto o Garaysa e algún outro. Queda moito traballo por diante pero viuse que o grupo funciona cada vez mellor. 

Cun so adestramento entre medio, o sábado o Xiria volve a viaxar á provincia de Pontevedra, esta vez para enfrontarse ao Bm Porriño, na cuarta xornada ligueira, desexámoslle moita sorte aos nosos rapaces neste partido onde, de seguro, veremos un Xiria mellorado tras o aprendido no encontro contra o Cangas.

XORNADA 2

08/10/2011     BM. MOAÑA 30 - GARAYSA XIRIA 34

Bm. Moaña 30: Ángel, Jesús (5), Juan, An_o (7), Jose M (5), Esteban, Mauro (4), Pablo, Mario (3), Juliodrián (

Garaysa Xiria 34: Manuel, Carlos (4), Gabriel (4), Iván (7), Alex (2), Arnejo, Eiroa, Borja (1), Juanca (8), Pereira (8), Souto

 

 O Garaysa Xiria afrontaba o seu segundo partido de liga, o primeiro coma visitante, e facíao na complicada cancha do Bm. Moaña, equipo contra o que xa o ano pasado pasara moitos apuros para acadar a vitoria. 

O encontro presentábase emocionante, con dous equipos con defensas abertas e exercendo moita presión, o que ía garantir ao público asistente un espectáculo de xogo rápido e con continuos contragolpes. Así foi, o partido comezou cun ritmo moi alto, con defensas case dende o medio campo que, con máis carácter que cabeza, poñían en serios problemas ao ataque rival. Ó Garaysa custoulle un chisco de máis acadar a mobilidade necesaria nos ataques posicionais para superar a aberta defensa dos do Morrazo, pola contra numerosos despistes na nosa defensa mantiñan aos locais moi preto no marcador. Desta forma chegouse ao remate dunha primeira metade de desaxustes no que o Xiria non foi quen de acadar o seu mellor nivel.  

Tras a reanudación, o partido seguiu polo mesmo camiño, a velocidade do encontro seguía provocando demasiados erros de pase e lanzamento que impedían poñer terra de por medio no electrónico. Pese a todo o Garaysa sacou o orgullo na recta final e soubo manter a cabeza fría no intre máis complicado, alentados por un gran Souto que no momento máis crítico, con empate no marcador, resultou un auténtico muro para os lanzamentos rivais, posibilitando así que os carballeses abriran esa pequena brecha no marcador que lle deu a vitoria co derradeiro 30 - 34. 

Esta semana o Garaysa Xiria disputa dúas xornadas ligueiras, a primeira o Mércores 12 ás 11:30 no Pavillón do C.E.I.P. Fogar. Coincidindo coa festividade do Pilar enfróntase ao Bm. Cangas, quizais o rival máis duro ata o de agora. E na fin de semana volve a viaxar lonxe de Carballo para disputar a 4ª xornada, contra o Bm. Porriño. Moita sorte.

XORNADA 1

01/10/2011     GARAYSA XIRIA 31 – OCTAVIO 29

Garaysa Xiria: 31 (19+12): Eiroa, Souto, Carlos, Juanca, Arnejo, Gabriel, Alex, Borja, Pereira, Manuel e Iván

Octavio: 29 (15+14): Iago, Alex, David, Aarón, Jaime, Alejandro, Iago F., Sergio, Rodrigo, Diego, Miguel e Fernán

 

Esta fin de semana comezaba a liga para o Garaysa Xiria, que recibía ao Octavio de Vigo no Pavillón Vila de Noia. Dende o inicio do encontro o Xiria sorprendeu ao rival cunha defensa moi intensa e profunda, que non tardou en darlle a primeira vantaxe do partido grazas a varios roubos claros de balón que foron ben transformados en goles ao contragolpe.

O Octavio tentaba buscar solucións a través dalgún troco nos postos dos seus xogadores, pero o seu ritmo de xogo seguía sendo lento debido a boa presión da defensa dos carballeses e unicamente lograba manter as diferencias a través de accións individuais. Ao descanso 19 - 15,  a prol dos locais, que puido ser maior de non ser por varios desaxustes en defensa que permitiron ao Octavio seguir enganchado.

Trala reanudación o Octavio colleu unha boa racha e conseguiu reducir a diferencia ata un gol, pero o Xiria non caeu en precipitacións e seguiu mantendo a súa filosofía cunha defensa intensa e facendo rápidos contragolpes. Co paso dos minutos o cansazo facía aparición entre os xogadores que perderon puntería e concentración. Pese a todo o Garaysa foi quen de manterse por riba no marcador ata o asubío final, 31 - 29.

A vindeira xornada o Xiria viaxará ata O Morrazo para enfrontarse ao Bm. Moaña, no que será o seu estreo lonxe de Carballo. Agardamos poder sumar de novo dous puntos máis e ir pulindo os erros amosados neste primeiro encontro.

Moita sorte.